Continuamos coa terceira edición do Mufest e onte volveu ser un pracer encontrarnos e xuntar vontades para visibilizar o traballo das mulleres no audiovisual. Deixamos algunhas imaxes da segunda xornada baixo estas liñas, pero as compañeiras de Galizacontrainfo teñen unha galeria de máis de 50 imaxes nesta ligazón.
E hoxe desde as sete e media comeza a proxección de filmes seleccionados no III Mufest. Se queredes coñecer títulos e autoras consultade o programa.
Este venres cúmprense exactamente 175 anos do nacemento de Rosalía de Castro e para celebralo a Asociación de Escritores en Lingua Galega organizou un feixe de actividades de todo tipo e en todas as direccións, animando ademais á cidadanía a agasallar un libro en galego e unha flor. Dende hai semanas, ademais, foilles remitindo aos concellos de todo o país solicitudes para que os plenos municipais aprobasen mocións declarando este 24 de febreiro como Día de Rosalía de Castro.
Até agora máis de trinta xa o fixeron ou están en proceso de facelo, comezando pola Coruña, A Estrada, A Guarda, A Pontenova, Arteixo, Arteixo, Betanzos, Cangas, Ferrol, Laracha, Muros, Narón, O Rosal, Ponteareas, Porto do Son, Redondela, Rianxo, Santiago, Teo, Tui, Valdoviño, Viana do Bolo, listaxe que irá aumentando nos próximos días segundo se vaian celebrando os plenos. Como salienta Mercedes Queixas, secretaria xeral da AELG, “o recibimento foi moi bo. A proxección que ten Rosalía é tal, que segue estando en nós case sen dármonos conta”.
“O obxectivo é achegar a obra de Rosalía todos os galegos, que hoxe coñecen unha Rosalía que non foi a que estudamos durante moitos anos”
Como salienta Queixas, os actos organizados nacen con vocación de ser moi “sociais” pois “a obra de Rosalía está concibida para o pobo, para a sociedade galega”. O obxectivo é “achegar a obra de Rosalía todos os galegos, sobre todo os máis novos, que hoxe coñecen unha Rosalía que non foi a que estudamos durante moitos anos. Os estudos de diferentes investigadores nos últimos anos fóronnos colocando ante unha Rosalía moito máis auténtica, con maior personalidade, unha muller culta, loitadora, vangardista…, algo moi diferente a aquela Rosalía simple, chorona, populista…, que outras xeracións estudamos”.
Queixas afirma que “Rosalía tiña un país na cabeza que non era a que daquela había e ela ergueuse convencida como a voz do pobo, dende unha posición consciente de certo prestixio ou con maior facilidade para chegar á sociedade. Era a voz dos oprimidos, dos silenciados, das maltratadas, das nunca valoradas, das invisibilizadas, das mulleres, da lingua, era a voz que falaba por todos”. E conclúe: “precisamos voces que nos recorden que non existe aínda o equilibrio para a sociedade, nin para o xénero, nin para as linguas, que hai unha lingua propia e oficial que segue sendo invisibilizada e marxinada”.
Durante toda a xornada haberá actos nos centros de ensino, pero tamén nas rúas e prazas máis significativas das principais vilas e cidades galegas. Estes son:
Santiago de Compostela, Panteón dos Galegos Ilustres, 18:00
A Coruña, Kiosko Alfonso, 18:30
Lugo, Salón de actos do IES Lucus Augusti, 10:30
Ourense, Liceo, 19:00
Ferrol, Galería Sargadelos, 19:00
Vigo, Museo de Arte Contemporánea (MARCO)
A Rúa, Biblioteca Pública Municipal, Casa da Cultura, 18:30
Pontevedra, Casa das Campás, 18:00
A Estrada, Sala de conferencias e exposicións CaixaNova, 19:00
Monforte, Centro de interpretación do viño, 21:00
Artigo de Praza Pública
A sala Isaac Díaz Pardo da Facultade de Veterinaria do campus de Lugo acolleu o acto de presentación da guía ‘Criterios de linguaxe non sexista’, elaborada polo servizo de normalización lingüística e a oficina de igualdade de xénero da Universidade de Santiago de Compostela (USC).
A publicación achega unha serie de propostas e recomendacións para un emprego da lingua “respectuoso coa igualdade entre xénero”, explica a USC nun comunicado de prensa.
Na comparecencia ante os medios de comunicación estiveron o vicerrector de Coordinación e Planificación do campus de Lugo, Pedro García Herradón; a vicerreitora de Responsabilidade Social e Calidade, Benita Silva Hermo e Manuel Bermúdez Blanco, técnico do servizo de normalización e un dos autores do documento.
A guía recolle casos habituais na comunicación interna e externa dunha institución como a USC, no seu plano formal pero tamén na súa vertente máis cotiá. Para cada situación, sinala as solucións máis respectuosas sen que o seu uso repercuta na claridade da mensaxe ou na súa eficacia comunicativa.
Via Galicia Hoxe
Hoxe compartimos con vós a ligazón desta revista, Debate feminista, que é unha revista semestral que se publica desde 1990, e que trata temas tan diversos como política, sexo, psicoanálise, literatura, historia, activismo, humor… e moitos outros máis, desde unha óptica que considera que o feminismo é unha perspectiva do pensamento político actual, que atinxe a persoas criticas e progresistas, independentemente de se teñen un corpo de muller ou de home.
Digna Rabia de Victoria Martins e Angel Rodriguez e Talking Heads (Muslim Women) de Fathima Nizaruddin a partir das 7.30 no III Mufest (CGAC). Non o perdades
Coa apertura da actriz galega de teatro Pilar Pereira, estupenda, a palestra sobre as mulleres diretoras en Portugal e a estrea da curtametraxe inglesa SIS, e coa presenza da súa diretora, Deborah Haywood, demos o comezo a esta terceira edición do Mufest.
Aqui vos deixamos algunhas imaxes do que foi, e podedes ter acceso a unha galeria máis extensa aqui
O vindeiro venres día 23 de febreiro ás 16.30 a cineasta
e Goya de Honra 2012 Josefina Molina visitará A Coruña para un coloquio
